Özgür Düşünme ve Tartışma Platformu!..

Seyîdxan Kurij / Rehmeta Xetîp yewna qide yew însan bi. O bi ruenişt-wiriştiş xo ya, bi xuy û husîyet xo ya, bi ehlaqî xo ya Kurd bi. Dr.Xetîp xo Tirkan ra tam qerfina bi, o bi her çî xo ya Kurd bi. Ê ambazî ma yê verîn pîyer îna bî. Înan waştîyen ke ma waharî ziwanî xo, kulturî xo, welatî xo veci.

Xetîp Demiralp lacî Kasim Demîralp o. Ê eşîrê Cîbrîyan keyê Suvêr ra yî. O dewê Kanîya Reş Qarxabazar de amewo dinya. Ê merdimî Xalit Begî Cîbrî yê. Şex Seîd wext ke Hinis ra wirzeno û hetî Pîrana şino, o verî keyeyî Kasim Demîralp de kombîyayiş virazeno.Qasim Demiralp yew merdimo Kurdperwer bi, verî ku bimiro, bi serranî xo yê pîlana bin kontrol de bi. Leşkeranî Tirkan o timû tim berdiyenî qereqol, heqaret û teda ey kerdiyen.

Amnanê 1974 de Çolîg de komelê Bin - Genç - Der nîyê rue. Na Komele merdimî ke nizdê PDKT bî na bi awan kerdibî.

Xetîp zi endamî na Komel bi, ey zi bi rîyê na komel xebata siyasî kerd. O cuwa pey bi endamî PDKT û heta kongra 1977 aktîf komitê Çewlîg de kar kerd.

1977 de Kongre TKDP koyê Cudî de virazîyayî, Xetip Demiralp serekî komite Cewlig bi. Wext ke na kongreya pey miyanî partî de di xetî amê meydan, Xetîp miyanî xeta kehen de ca girot.

Darbeyî eskerî yê 12 elûl 1980 ya pey PDKT semedî yew mudeya karî xo da edilnayiş. Serranî 1988-89 de Dr. Xetîp Demiralp dest bi karî reorganîzasyona partî kerd. Ey bi çend embazanî xo ya dest bi xebat kerd. Aşmanî Teşrîne-Kanûnê 1990 de netîceyî xebatê Xetîp û çend embazanî ey de PDKT konferans viraşt. Na konferans de yew komîte amê vîcnayiş û qerar amê girotiş ke no komîte partî bero kongre. Nê komîteyî newe ra dest ci kerd organa navendî ê partî kovara « Xebat « vet û Başûrê Kurdistan de yew qampê eskerî kerd a.

Dr. Xetîp Demiralp no proses de de-fakto Serekî PDKT bi.

Aşmê Teşrînê 1991 de PDKT kongrê xo viraşt. Dr.Xetîp nêwaşt ke sekreter bi, yewna embazî ey bi sekreterî PDKT. Amnanî 1992 de PDKT bi çend rexistin û grubanî bînana amê piyehet bi namê PDK-Hevgirtin yew partiya newî awan bîy. Dr. Xetîp Demiralp torî na xebat nêbi.

Dr.Xetîp Demiralp verî 1980 Fakultê Tip ê Amed de qedî xo viraştib, la ridî karî xo yê siyasî re, ey 1992 de wendişî xo qedna bi doktor. Payizî 1992 de nêweşîyê Xetîb eşkera bi. O çend aşme nêweş mendi, 15 Adar 1993 de şi rehmey homayi û dewa xo ya giredayîya Kanîreş Qarxabazar de defin bi.

Embazanî Dr.Xetîp Nihat Elçî yo Çewligij derheqî ey de îna vûno :

«  Rehmeta Xetîp yewna qide yew însan bi. O bi ruenişt-wiriştiş xo ya, bi xuy û husîyet xo ya, bi ehlaqî xo ya Kurd bi. O têna fek de Kurd nêbi, o bi mezg û ruhî xo ya samîmî yew Kurd bi. Ey çirey cixarê paketî nêşimitîyen, tim û tim tutun şimitîyen.

Yew roj mi va: Kek Xetîp ti çira cixareyo pişte nêşimenî?

Ey va: Çi wext ke dewleta Kurdistan saz bî, palkayanî Kurdistan de, bi damgayi Kurdistan paketê cixaran vêcîyay, ez o wext paket ernena û şimena.

Rehmeta Xetîp wext ke nêweş bi, ez şîya mi o Nêweşxaneyî Hacetepe de zîyaret kerd.

Ey mi ra va: Ah! Ez weşbînî, ma pîya bişinî Kurdîstana Başur de bigêrayn, la ez kansera, ez zûna ke ez hin weşnêbena. Raşta zi o nêweşîya Kanser ra merd.

Çend serî cuwa pey ez yew Park de rueniştîbîya, yew ambazî yew paketê cixaran xo cîyeb ra vet û cixare teklîf mi kerd. Wext ke mi serî paket de nuşteyî “ Delal” dî, hesir kotî mi çiman.

Ey ambaz Va: Se bi? Ti qey bermene?

Mi va: Ah! Nika Xetîp weşbînî û mi na paket bidayn ey.

Ey tim vatîyen; “heta paketê ma nêvecyo, ez paketê Tirkan nêşimena. Mi zaf tayn însan sey Xetîp dî.

Rehmetî Xetîp de o qide yew welatheskerdiş bibi ke tim na meselay Daye mi yena mi vîr.

Dayê mi vatîyen: Meselay Şex Seîd de dewê Az ra yew merdim ke nameyî ê Şerîf o surgun kenî Kayserî. Kayserî de destawê ey yena. O gereka şuero veco teber, destawe xo ya gird(Gî xo) bikiro.

O ambazanî xo ra perseno, vûno: Ez ça vecî teber?

Ambazî ey vûnî: Biewnî tiwalet ho îta de yo, şue tiwalet

O vûno: Ero ez şima ra vûna ke ze gî xo tor gî Tirkan nêkena.

Rehmeta Xetîp xo Tirkan ra tam qerfina bi, o bi her çî xo ya Kird bi.

Ê ambazî ma yê verîn pîyer îna bî. Înan waştîyen ke ma waharî ziwanî xo, kulturî xo, welatî xo veci.

Mi çend roj cuwa ver bi Kirdkî „Dîwan“ yew ambazî wend. Ez zaf pê wa bîya, ez yewna qide bîya. No “Dîwan” W.K.Merdimîn nuşto, o zi Çewlîgij o. O zi ambazanî ma yê verînan ra yo.

O wahar ziwanî xo, kulturî xo, ambazanîxo, welatî xo vêcîyawo”.