Özgür Düşünme ve Tartışma Platformu!..

Merhaba/ Seyidxan Kurij

Nuştişî nuşteyo vêren ziwar o. Yew mudet cuwa ver embazo erjîyaye Murat Daĝdelen mi ra rîca kerd ke ez semedî kêyepelî (Sîte) Kurdîstan – Aktuellî ya ge –ge binusî. Mi waşt ez yew gam lez nuşteyî xo yo vêren binusî. No rid ra eke no nuştê weşî şima nêşuyero zi qusir mi meûnîyen.

            Mi heta nika nuşteyî quncikan yanî nuşteyî aktuel/polîtîk nênuştî. La çend sebeban ra mi îta de nuştiş qebûl kerd. Ya vêren ez kek Murat û çend embazanî bîn ke îta de nusenî naskena û qîmet dana nê embazan. Mi waşt yew per ra ez destek bidî nê embazan û per bîn ra zî pa nê embazana semedî şarî ma û ziwanî ma tayê çîyan bikerî. Kek Murat wazeno ke no keyepelî de nuşteyî kirdkî zafî bîy. Mi zî waşt ke ez destek bidî nê embazan ke hêna zaf kirdkî bîyero nuştiş. Ez hedreyê nê nuşteyanî kirdkî redekte bikerî ke nuşteyî goreyî standartî kovara „ VATE“  biyerî çap kerdiş.

Ez pa çend embazana 1996 ra nat kirdkî ser xebat kena. Ma her serr yew yan zî di ray yenî pîyeser û îmla- gramer û termînolojîya kirdkî ser xebat kenî. 1997 ra nat zi ma bi nameyî „VATE“ yew kovar vecenî. Na kovar 32 hûmar vecîyaya. Xebatê ma ya gramer zi ameya yew merhale. Ma semedî raşnuştişa taye çîyî muhîm tespît kerdî. No rid ra ez îta de goreyî qaîdeyanî VATE nusena. Sebeb ke Çolîgij fehm bikerî, ez tayê çîyan hanc zi goreyî fekî Çolîg binusî, la ez qaîdeyanî Vate esas gena. Wa hemşerî minî Çolîgij qusir meûynî (meewnîyî).

            Ê embazî bîn ke îta de kirdkî binusî ez înan ra rîca kena heta mumkun bo, goreyî standartî “VATE” binusî. Ez zana kesî ke myanî na xebat de neyî, înan re bi standartî “VATE

nuştiş ziwaro. Heta mi re zî bi standartî “ VATE” nuştiş ziwaro. Çimkî ma ra kesî zî dibistana de kirdkî nuştiş û wendiş nêmusayo. Ma pîyer dadî – babî xo ra no ziwanî musayî. No rid ra zî ma pîyeri tena fekî mintiqaya xo zûnî. La yew zûno ke nêbo zûnî nuştiş û wendiş, o ziwan neşkeno bimano, o bênate ra darîyeno we, beno vîn. Eger ma wazenî ziwanî ma biciwîyo, vîn nebo, ganî ma bi no ziwanî binusi. Nuştiş zî bi qaîdeyan beno. Her ziwanî de qaîdeyî nuştiş estî û nê qaîdeyi standartî. Her kes neşkeno goreyî kêfî xo, goreyî qaîdeyanî xo binuso. Raşta lehçeyî kirdkî de hama standartîze kerdiş temam nebîyo, la “Gruba xebat ya Vate” 10 – 12 serrîyo ke no derheq de hol yew xebat kerda. Qê nêbo a xebata ke heta ewro ameya kerdiş, ma goreyî na xebat binusi, ma standart kerdişî ziwanî xo re yew hizmet kenî.

            Ma wazenî no Keyepel de nuşteyî kirdkî zaf bîy, çimkî çiqas ziwanî ma biyero nuştiş û wendiş, hem hend verd şino hem zi vînbîyayiş ra xelesyeno. Çi gune ke Çolîgijî ma zaf taye kirdkî nusenî.  Ez roşnvîranî ma re rîca kena, çîko ke tirkî nusenî, wa kirdkî zî binusî. Ez zûna ke zafe embazan cesaret nekenî kirdkî binusî, la ganî kes yew ca ra destcibikero. Ma babîk nuşteyanî şima yê.